Við höfum nú endurnýjað hjá okkur blóðrannsóknartækin og völdum það nýjasta frá rannsóknarfyrirtækinu IDEXX (www.idexx.com). Við erum himinlifandi með þau og þau munu stuðla enn frekar að nákvæmari greiningum og enn betri þjónustu fyrir skjólstæðinga okkar.

Um er að ræða fullkomin tæki til blóðrannsókna á kemi og blóðmynd sem gefa nákvæmar niðurstöður á fáum mínútum. Auk þess getum við nú mælt ýmis önnur efni sem við höfum áður þurft að senda út úr húsi til rannsóknar á erlendum rannsóknarstofum, svo sem magn ákveðinna lyfja í blóði, hormóna eins og skjaldkirtilshormónsins, cortisol og mótefna gegn sníkjudýrum og veirum svo eitthvað sé nefnt.

Í starfi okkar stöndum við frammi fyrir þeirri staðreynd að dýrin geta ekki sagt okkur hvar þau kenna til eða hvernig þeim líður. Við verðum að reiða okkur á nákvæma skoðun, töluvert innsæi og svo rannsóknir. Blóðprufur og niðurstöður úr þeim eru mjög mikilvægur þáttur til í þessu stundum flókna púsluspili. Blóðprufur eru einnig notaðar fyrir svæfingar til að auka öryggi við aðgerðir. Við stefnum alltaf að því að gera betur og þessi endurnýjun á tækjakosti okkar er liður í því.

Við erum líka komin með laser tæki sem við notum á skurðsár eftir aðgerðir til að flýta gróanda. Jafnframt tökum við nú á móti dýrum í laser meðferð við t.d. gigt, verkjum af ýmsum toga, sárameðferð , eyrnabólgu o.fl.